Tennbrikker skaper misjonsglød
Dei er no 57 frivillige, med ein snittalder på 75 år. I fjor fekk dei tolv nye, og berre ein slutta. Fleire av dei frivillige har inga NMS-tilhøyrsle frå før. Motivasjonen er fellesskapet og eit arbeid med meining.
Stadig nye frivillige
Knausen jobbar målretta for å ta vare på medarbeidarane sine og for å skaffe nye.
– Vi rekrutterer på fleire måtar. Blant anna oppfordrar vi frivillige til å spørje vener og kjente. Vi arrangerte «open dag» i haust for alle som ville kome og sjå arbeidet. Vi spurte også lokale misjonsforeiningar om dugnad for å sortere lys. Dessutan annonserer vi i lokalaviser i området, samt i kyrkjelydsblad. Desse tiltaka har ført til at fleire har teke kontakt og blitt frivillige, fortel Kåre Myraunet, marknadsansvarleg og sekretær på Knausen Lysstøperi.
ENGASJERT: Gert Nielsen på Knausen Lysstøperi. Foto: Skarp Reklamebyrå.
I tillegg har Inge Hill, styreleiar på Knausen, sin eigen metode.
– Inge har ei liste med namn han ber for, som han kontaktar etterpå. Så har det hendt at før han får ringt dei, har dei kontakta han med spørsmål om å begynne. Og det er jo heilt fantastisk.
Viktig å involvere
– Vi prøver å legge til rette for variasjon og at frivillige får oppgåver som passar. Alle arbeidsoperasjonane har beskriving av prosedyre, noko som gjer at dei frivillige kjenner seg trygge.
Samtidig er det ei kvalitetssikring og fører til mindre feilproduksjon, fortel Kåre.
Styret ønsker å involvere dei frivillige mest mogleg og å informere godt. Dei sender informasjon på e-post og sms. I tillegg har Kåre laga ei eiga intranettside for Knausen, som berre deira frivillige har tilgang til.
– Vi ser at den blir brukt. Informasjon er viktig for å anerkjenne dei frivillige og skape fellesskap. Slik kan alle på Knausen kjenne seg som del av eit stort lag, der alle er like viktige, seier Kåre og fortel vidare at styret ønsker å få tilbakemeldingar og innspel.
– Vi vil gjerne bli betre, så tilbakemeldingar er sentralt.
Kåre lagar statistikk både på bestillingar og sal i butikkane og på produksjonen hos Knausen. Statistikk for salet dei siste åra viser at det aukar jamt og trutt.