Heidrar dei frivillege på NMS Gjenbruk

Mari Ann Vattøy og Annika Brandal i styret til Ulstein frivilligsentral troppa måndag opp i lokala til NMS Gjenbruk i Ulsteinvik sentrum.
Der overraska dei den frivillige gjengen med eit diplom, blomar og 5.000 kroner. NMS Gjenbruk er nemleg tildelt frivilligprisen for 2022 i Ulstein. Frivilligsentralen deler kvart år ut frivilligprisen på den internasjonale frivilligdagen 5. desember.

– Dette var kjekt – og det er veldig fint å bli sett pris på. Denne prisen er absolutt ei anerkjenning av det gode arbeidet som har blitt gjort her gjennom to tiår, seier Inga Marie Aurvåg og Anne-Marie Hopland.
I år er det faktisk 20 år sidan NMS Gjenbruk først opna dørene, i Kyrkjegata. I dag har butikken tilhald i bygget på Sanden der Cubus i si tid heldt til. Sidan den gongen er det tallause frivillige timar som har blitt lagt ned for å drive gjenbruksbutikken.

Takksame: Frivilligprisen i Ulstein for 2022 gjekk til dei frivillige i NMS Gjenbruk. Frå venstre ser ein Bjørg Hasund, Anne-Marie Hopland, Turid Husøy, Inga Marie Aurvåg,
Aase Ulla og Mari Ann Vattøy og Annika Brandal i styret til Ulstein frivilligsentral.

Sosial møteplass
NMS Gjenbruk er Noreg si største gjenbrukskjede med 52 butikkar, som blir drive av 2.500 frivillige medarbeidarar. I Ulsteinvik er det rundt 40 som utgjer arbeidsstokken, og som jobbar i turnus. I fjor omsette butikken for 1,1 millionar kroner, medan dei i år reknar med å passere 1,5 millionar.
– Vi tel ikkje timar, dette er berre kjekt å få vere med på. I tillegg til å vere ein butikk, er det ein fantastisk sosial møteplass for mange, seier Aase Ulla.

– Det er kjekt å føle at nokon har behov for ein, også etter ein er ferdig i yrkeslivet, seier Turid Husøy.
Husøy og Ulla fortel at dei har merka ein oppsving i salet fram mot jul, og at til dømes ukrainske flyktningar, men også folkehøgskuleelevar, nyttar seg av tilbodet.
– Det er mange av dei som går på Sunnmøre Folkehøgskule som ønsker å pynte til jul, og dei har funne mykje fin julepynt her hos oss, seier dei.

– Fortent
Mari Ann Vattøy og Annika Brandal i styret til Ulstein frivilligsentral fortel at dei fekk inn mange gode nominasjonar, men at NMS Gjenbruk merka seg ut.

– Det er veldig fint å gi prisen til nokon som har vist så godt igjen i Ulstein-samfunnet, gjennom heile tjue år. Det er kjekt å kunne bidra til eit ekstra kjekt 20-årsjubileum, seier dei.