Misjonsbasar i Ålvundeid på Nordmøre med skikkeleg basarstemning!
Full sal, og åresalget gjekk strykande.
Det er alltid spennande om det kjem bra med folk, og no vart det heilt fullt rundt borda! Åresalget gjekk strykande, og basarbordet med litt større gevinstar, var godt besøkt. Gevinstlista var lagt ut på bygdesidene på Facebook nokre dagar før, med oppfordring om å vippse pengar til lodd, og det benytta mange seg av som ikkje hadde høve til å komme på basaren.
Ålvundeid barnekor, 40 år i år, gledde forsamlinga med fin song. Snakk om songglede! Arne Drøpping delte frå bibelen «Kom til meg alle de som slit og har tungt å bera, eg vil gje dykk kvile». Matt.11.28.
Frivillig på gjenbruken tok ideen med mannekengoppvisning, og det var eit populært innslag, som frista til å gå i butikken. Foto: Egil Veddeng
Han hadde med eit metallbilde av ein som ber ei tung bør, legg ho ned ved korset og går oppreist vidare. Arne gav oss og misjonsglimt frå Bankok i Thailand med musikkskule under motorvegen, og Don som vart ein fantastisk fiolinist. Han fekk tilbod om fast jobb i det beste orkesteret i landet, men valde å vere fiolinlærar for dei fattige borna i slummen.
Nytt av året var uhøgtideleg mannekeng-oppvisning av klede frå NMS gjenbruk på Sunndalsøra, der det er klede og sko dei sel. Ei av dei som er frivillig, Inger Elisabet Bråten, tende på ideen å reklamere for dei fine kleda dei har, og det vart eit skikkeleg vellukka innslag, som vi håpar kan få enda fleire til å besøkje butikken i Nordmørsvegen.
Tradisjonell basarkost på indre Nordmøre er smørgraut og vaflar, sjokoladekake og smørbrød, og det gjekk med to store grautbollar.
Resultatet vart godt over 20 000 kroner, og det blir berre husleige å trekkje frå, sidan alt elles er gåver.
