Ny medarbeidar i NMS Global frå Vigra

Geir Sakseid Bustad: Vigra, men er frå Stord Gift med Helga og har 3 vaksne born

– Kva er inngangen din til NMS?

– Eg har vore tilknytta NMS heilt sidan studietida på Misjonshøgskulen. På nittitalet var kona mi, Helga og eg utsendingar til Midtausten, og då me kom til Bergen etter sju år i Egypt, starta me Bergen Internasjonale Menighet på initiativ frå NMS. Seinare har eg arbeidd i ulike stillingar i Den norske kyrkja. Då eg var sokneprest i Giske tok eg vidareutdanning på Høgskulen i Volda, og det var under arbeidet med masteroppgåva i kulturmøte at eg fekk fornya interessa for NMS sitt arbeid i Midtausten.

– Kvifor søkte du på denne stillinga og kva skal du jobbe med?

– Eg skreiv ei masteroppgåve om NMS si historie i Midtausten sidan oppstarten i 1990, og fekk dermed god kjennskap til dei ulike prosjekta som NMS har engasjert seg i etter at me sjølve flytta tilbake til Norge. Eg kjende at dette var engasjerande, og kunne godt tenka meg å jobba med det. For to år sidan byrja eg som misjonsrådgivar i Møre bispedøme, og fekk jobba meir med misjon, og når det blei lyst ut ei stilling som rådgivar for Midtausten sist sommar, fekk eg ikkje fred for å la den gå forbi meg.

– No skal eg jobba med å halda kontakt med alle samarbeidsprosjekta som NMS har i Midtausten, og så har eg eit særleg ansvar for å følgja opp nokre av dei litt tettare. I første omgang gjeld dette Bibelselskapet i Egypt, menneskerettsorganisasjonen Middle East Concern og medieorganisasjonen Middle East Media, som eg arbeidde i fram til 2001.

– Blir det mykje reising på deg?

– Noko reising blir det nok i den nye jobben, om pandemien slepp taket. I skrivande stund skulle me ha vore i Egypt, men den reisa måtte utsettast. I utgangspunktet blir det nokre turar til prosjekta kvart år, men eg har kontorplass i Ålesund, og slepp å pendla til Stavanger.

– Kan vi lokalt i regionen dra nytte av deg?

– Om det passar med timeplanen kan eg gjerne brukast her i regionen. Eg fortel meir enn gjerne om det spennande arbeidet NMS sine samarbeidspartnarar gjer i den arabiske verda, i Tyrkia, Iran og austover heilt til Pakistan.

– Har høyrt rykte om at du og spiller i band?

– Nja … Eg spelar tuba i Godøy Brass. Det er eit lokalt korps med passeleg enkelt nivå på musikken og svært høg trivselsfaktor!